Osmani- Goffus-it : I rëndësishëm koordinimi institucioneve të Kosovës me NATO-n për hapjen e Urës së Ibrit
Presidenca ka dhënë detaje për takimin Presidentes Vjosa Osmani, me Ndihmës Sekretarin e Përgjithshëm të NATO-s për operacione, Thomas Goffus.
“Sipas Presidentes Osmani, Kosova mbetet e përkushtuar për bashkëpunim të vazhdueshëm me NATO-n dhe KFOR-in për adresimin e sfidave në fushën e sigurisë.
Më tej, Presidentja Osmani falënderoi NATO-n për angazhimin e deritashëm për paqe, siguri dhe stabilitet dhe në këtë kontekst ritheksoi objektivin strategjik të Kosovës për integrim në komunitetin euroatlantik, duke shprehur besimin se anëtarësimi në NATO do të kontribuojë për sigurinë dhe stabilitetin e gjithë rajonit.”, thuhet në njoftimin e Presidencës.
Po ashtu bëhet e ditur se në takim me Ndihmës Sekretarin Goffus, ndër të tjera u diskutua edhe për çështjen e hapjes së urës së Ibrit.
“Presidentja Osmani ka përsëritur qëndrimin për hapjen e urës, porse ka potencuar rëndësinë e mirëmbajtjes së komunikimit, koordinimit dhe thellimit të bashkëpunimit në mes të institucioneve tona dhe partnerëve tanë të sigurisë, veçanërisht me NATO-n, për hartimin e një plani të përbashkët të zbatimit për hapjen e urës. Hapjen e urës, Presidentja Osmani e ka cilësuar si një veprim në funksion të normalizimit dhe integrimit në interes të të gjithë qytetarëve, pa dallim etnie.”, thuhet në njoftim.
Osmani takon ndihmës-sekretarin e përgjithshëm për operacione të NATO-s
Presidentja e Kosovës Vjosa Osmani ka pritur sot në takim ndihmës-sekretarin e përgjithshëm për operacione të NATO-s, Thomas Goffus.
Mediat u lejuan të marrin vetëm pamje në fillim të takimit, derisa nuk priten deklarime.
Ndihmës-sekretari i përgjithshëm për operacione të NATO-s, Thomas Goffus do takohet edhe me kryeministrin Albin Kurti dhe me zyrtarë të KFOR-it në Kosovë.
